Les estampes de los sindicalistes trancaos nos despachos del Ministeriu d'Industria nun tienen preciu. Esos chándales, esos sacos de dormir, esos sofás (abulta que son de pelleya de bona calidá), eses zapatiyes tiraes al debalu. y esos pelos y barbes encanecíos polos años de llucha y representación sindical. Si nos fixamos, dámonos cuenta de que son imáxenes antigües, como d'otru tiempu que, paradoxa, parez que tovía nun pasó, anque yá nun seya'l nuestru. ¿Pero nun teníemos arreblagao perriba de la crisis estructural y pasáremos yá «del carbón al ratón»? Ello ye que non, que siguimos cola mesma estampa de los años setenta, ochenta, noventa y dos mil, namás pasamos de vela en blanco y negro nel papel de los periódicos al color de les pantalles del ordenador nes páxines web. La unanimidá alredor del carbón asturianu ye proverbial, y, como representación d'ella, la unanimidá alredor de José Ángel Fernández Villa, el que más canes peina de los presentes na estampa del encierru, siempre, por cierto, contra les decisiones d'un gobiernu del partíu nel que milita, pal qu'atropa votos cada vegada qu'aporten les elecciones y que gobernó sentándose na so executiva. Hasta Álvarez -Cascos yá de campaña electoral- yos manda telegrames de consuelu y solidaridá.
El casu ye que, trenta años depués, millones d'euros de fondos mineros depués, hai comarques enteres que siguen dependiendo del carbón pa la so supervivencia, d'un carbón que nun tien más razón de ser qu'una decisión política, enantes de Madrid namás, agora tamién de Bruseles. Pero del ratón, del ordenador, de la fibra óptica nin de nada semeyao saben peles tierres de Cangas, Ibias o Degaña. L'éxitu de los sindicatos mineros son, nun hai dulda, les prexubilaciones, pero'l so fracasu ye eso que llamen «reindustrialización», palabra máxica pa convocar a los votantes en tiempu d'elecciones. Nun hai namás qu'entruga-yos a los trabayadores de Venturo XXI pa saber en qué consiste la reindustrialización: ocurrencies de funcionarios adictos y con mandu en plaza pa gastar que deciden lo que se va llevar la próxima temporada n'asuntos empresariales. Ellos arriesguen el dineru de los contribuyentes asturianos, y los socios privaos (a los que siempre conocen d'otres coses) nun arriesguen nada. Al cabu, perdemos los de siempre.
Convién dicilo ensin sordina a esti altor: los sindicatos mineros, y tol mangaráu de poder de la izquierda que gobierna Asturies, son unos inútiles qu'en más de trenta años nun fueron quien a ofrecer un futuru a les cuenques mineres dependientes del carbón y que namás supieron ofrecer un presente de prexubilaciones pa los mineros y d'emigración pa los sos fíos. Lo demás ye templar gaites y dexase llevar pela corriente unánime que se convierte en mieu a discrepar. Yo tamién quiero que Bruseles allargue les ayudes al carbón, non porque seya un recursu estratéxicu nin porque tenga futuru nengún, sinón poles families que dependen d'esa actividá. Pero visto pa lo que sirve, depués de tantu tiempu de marafundiar recursos y esperances, qu'esos sindicalistes y esos políticos xestionen esa situación, hasta dan ganes de falar cola Unión Europea pa que lo tranquen too d'una santa vez. D'otra manera, que-yos dean les perres lluego, que Javier Fernández s'abrace con Villa, que se pongan a pidir el votu pa les autonómiques del añu qu'entra y que nos quiten de delantre esa estampa del encierru que nos recuerda lo atrasaos que tamos.
No hay comentarios:
Publicar un comentario