La faza triste de la realidá asturiana (hai otra muncho más prestosa) cada día s'asemeya más a los tiempos grises del franquismu, a la década de los años cincuenta, a los tiempos del partíu únicu. Esplícome pal que tenga interés y pa los que yá tean espelurciaos pola comparanza, anque éstos nun atiendan a esplicaciones. Nun niego que vivamos nuna democracia, que les elecciones seyan llibres o que nun se cumpla lo sustancial de les lleis al respective de cómo escoyer a los nuestros gobernantes. Pero el conglomeráu de poder dominante, eso que en fórmula gubernamental se llama izquierda plural, preséntasenos n'esencia n'Asturies como un partíu únicu, como un pensamientu y una acción política que lo arrodia too y que ye quien a dar una sensación de pluralidá siendo, nel sen, too la mesma cosa.
Si un repasa la hemeroteca de los años cincuenta, y nun conoz nada del autoritarismu y totalitarismu español d'entós, puede dar en pensar que se vivía nuna sociedá cuando menos diversa, con matices, corrientes de pensamientu y fuerces escontraes que s'engardíen pacíficamente nel papel impresu. Asina, alcaldes que retrucaben al xefe provincial del Movimientu (partíu únicu), gobernadores civiles que discutíen decisiones del presidente de la Diputación y periodistes que poníen de vuelta y media a autoridaes de toa mena podíen dar una sensación de pluralidá que nós sabemos yera falsa. Reíense de los incautos, al tiempu que compartíen idees, autoridá y mandu sobre unos ciudadanos indefensos.
Agora, la izquierda plural batalla tamién gastando unes traces de diversidá que nun son más que les solombres d'una realidá muncho más plana. Asina, los ministros, líderes y alcaldes socialistes engárdense pola llínia Sama-Velilla o pola Sotu-Penagos, pero nun dexen d'encabezar les candidatures del so partíu y de votar contra los intereses asturianos allá onde los manden; el Gobiernu asturianu alderica encerriscáu de la incineradora, el banzáu de Caliao, el bable, l'hospital del Oriente, etcétera, pero nun dexa d'aprobar unos presupuestos de despilfarru contra los asturianos; el sindicatu UGT (Eduardo Donaire) apúntase pa quitar a Areces y poner a Javier Fernández como candidatu-presidente (como si nun hubiere elecciones con votu universal pel medio) pero si nun gana esi apueste votarán al que-yos toque.
Tantu abarca el 'partíu únicu' que nél cueyen dende les relaciones fraternales colos empresarios más aquello d'esta Asturies capitimenguada, hasta un personaxe políticu como Rafael Palacios, director xeneral pa la emigración y la cooperación, que s'axunta col dineru de los asturianos colos más sufridores y escorríos pueblos de la humanidá entero.
Pero, ¿y el PP?, s'entrugarán dellos. ¿Tamién el PP ye del "partíu únicu"? Ye bona llástima tener que dicir que la derecha asturiana arrecostina con un síndrome d'Estocolmo que lu fae repetir como ave tropical tolos tópicos de la izquierda eterna y que desconoz tanto Asturies y la so realidá que lo mesmo val pa tar equí que pa tar en Guadalajara.
No hay comentarios:
Publicar un comentario