Esti añu que cuerre de 2011 ta dedicáu, por delles organizaciones internacionales que nun paga la pena mencionar equí, al silenciosu y nocherniegu esperteyu, un animal que se conoz que ye perimportante pal caltenimientu de munchos de los ecosistemas planetarios y que, por mor de la so actividá na escuridá, del so aspectu desagradable y de la lliteratura en xeneral, nun recibe'l tratu nin l'atención humana que se merez. Un mamíferu volador y ciegu que llimpia sotos, biesques y pradería del sobrante d'insectos, que cuida asina de les colleches y hasta de la nuestra salú, según dicen los que saben del asuntu. Al tiempu que-y dedicamos esfuerzos, anque pequeños, al esperteyu, llevántase una feroz rabasera d'indignación porque los senadores falen en catalán, gallegu y vascu nel Senáu. La convivencia de los idiomes y, más entá, l'aceptación de los idiomes de los demás colos que convivimos ye un asuntu d'importancia, y por eso una senadora asturiana del PSOE, desconocida dafechu hasta esti día pola población a la que representa, declaró ufana cómo-y prestaba sentir falar nos idiomas cooficiales talo a como-y presta a un neñu montase nel 'Dragon Can' de Port Aventura. Pero del asturianu nun dixo nada, porque l'asturianu tien que dir a sentilu al Fontán, o a Cimavilla o a un prau o a una cuadra.
Sicasí, ¿qué nos importen a los asturianos los pinganillos y los esperteyos? Nada. Nin una cosa, nin la otra, nin munches otres tienen nada que ver con nosotros, cuando tamos en primera fila asistiendo estelaos al fin d'un réxime políticu, al castañazu del social-sindicalismu asturianu. Y ello quier dicir el sapiazu de tolos que foron, va yá más de trenta años, beneficiarios del réxime: los que ganaben y facíen como que gobernaben, y los que perdíen y facíen como que s'oponíen. D'una parte, la derecha asturiana tarazada en dos, nun espectáculu de guiñol onde los actores y los personaxes intercámbiense mientres pasen los años, y los que güei tán con Cascos l'otru día diben con Marqués, y los que va unos años quedaron con Ovidio güei acaben en. Yá nun los podemos creer (nun tienen creitu), nin a los de Gabino de Lorenzo, tan beneficiariu del réxime qu'agora argaya, nin a los del ex vicepresidente d'Aznar, tan oportunista qu'hasta ye asturianista. D'otra parte, l'arecismu, brazu institucional hasta anteayeri de la FSA y del sindicatu, arrevienta cola detención de Riopedre y la camaretá que lu acompañó tantos años de xestión. Yá nun los podemos creer (nun tienen creitu), nin a los del Gobiernu nin a los del partíu, nin a Migoya (toa apurada negando al collaciu de gabinete y mano derecha de Vicente Alberto), nin a Javier Fernández, que, ¡vaya cara!, fae como si Riopedre nun fuere hasta hai unos meses conseyeru del Gobiernu del partíu del que ye secretariu xeneral. Pa eso pidieron el votu tantes veces a los asturianos: ¡pa poner a Riopedre de conseyeru!
Acaba yá por fin y dafechu una época, tráncase una puerta, lo que quier dicir, inevitablemente, que se tien qu'abrir otra. Nin la derecha nin la izquierda tienen yá n'Asturies creitu (nun los podemos creer), porque llevantaron un réxime, sirviéronse d'él y agora argaya de vieyu, corruptu y sinsustancia. Que nun nos entretengan con esperteyos nin con pinganillos: lo único importante ye saber acolumbrar l'alternativa al réxime morribundu, la puerta nueva que se nos abra pa sustituyir a los Areces, Fernández, Ovidios, De Lorenzos y Cascos.
No hay comentarios:
Publicar un comentario