El señor Fernando Lastra, a la sazón portavoz del PSOE nel Parlamentu asturianu, vien tirando cuantayá con bala (metafóricamente) cada vez que fala, y dalguna vez tuvo incluso que rectificar palabres que mancaben como cuchiellos porque se-y calentaba la llingua. Esti día, relacionó xenéricamente l'orgullu de ser o sentise asturianu con posiciones polítiques d'estrema derecha, nada menos.
La noticia nun ye, nesti casu, la salida de pata de bancu del señor Lastra, nin tampoco lo ye que'l pie pa la so xelonada y-lu tenga dao un «reconocíu asturianista» como l'ex vicepresidente del Gobiernu d'Aznar, el redivivu Álvarez-Cascos. Menos tovía ye noticia que'l mesmu PSOE afalague l'orgullu de sentise catalán, o andaluz, o gallegu, auquiera que-y convenga electoralmente y nunca enxamás se-y ocurra relacionar esos sentimientos cola estrema derecha, que más bien los relaciona col progresismu de la triba que seya, menos n'Asturies, onde la emoción d'identificase col país qu'ún habita, o col país nel qu'ún nació o col país qu'ún escueye llibremente, resulta ser d'estrema derecha. La noticia ye, en realidá, la poca protesta social qu'una babayada asemeyada vieno a producir na silente sociedá asturiana.
La política asturiana tien un parecíu mortal cola vieya hostelería asturiana. Anque por suerte les coses yá camudaron muncho, los llectores que yá acumulen unes décades d'esperiencia podrán convenir conmigo en cómo va tiempu los chigres d'Asturies yeren d'una especie única nel mundu: ellí'l cliente nunca enxamás tenía la razón. El propietariu, polo xeneral foscu, mal encaráu y xostrón, riñía a los veceros tantes veces como-y daba pola gana, retrucaba a la petición más inocente y educada con ironíes, agudeces y coñes xeneralmente de pocu talentu, servía'l xéneru que-y petecía muncho más que'l que se-y pidía y tenía'l llocal, polo xeneral, gochu y abandonáu. Con too y con ello, el parroquianu siguía acudiendo al establecimientu como si nun hubiera otru na redolada más llimpiu, surtíu y con serviciu más atentu, anque siempre hubiere dalgunu asina, que nun vamos desaxerar, nun yeren toos de la mesma triba.
Colos políticos y los asturianos pásamos daque asemeyao a lo que-yos pasaba a los nuestros güelos colos vieyos chigres del país: miéntennos, insúltennos, fáltennos, engáñennos y, ¡contra!, siguimos diendo a visitalos, urna mediante, como si nun tuviéremos al llau otros menos mentirosos, más educaos y sinceros. Por eso'l portavoz Fernando Lastra puede dicinos que sentise asturianu ye d'estrema derecha y nada nun pasa que nun seya la protesta amatagada d'unos cuantos asturianistes.
La verdá ye qu'enterase de que ye ún d'estrema derecha nun sienta nada bien al cuerpu, y la sensación nun se quita nin dando cuenta d'una caxa sidra en media hora. Lo más doloroso ye que comparte ún esa condición con persones y personaxes de lo más desemeyao, tanto, qu'amoria ún sabiendo que la estrema derecha asturiana inclúi a Xuan María Acebal, don Pelayo y Xovellanos; el Cuartetu Torner, la Pastorina y'l gaiteru Lliberdón; Villa ('el Guaje', polo de celebrar los goles echando un culín de sidra virtual), Chechu Rubiera y Quini; Aida la Fuente, Belarmino Tomás y Rafael Fernández; l'Urriellu, el bosque de Peloñu, los urogallos, l'osu pardu, 'Paca' y 'Tola', los horros, les panoyes, la fesoria. Voi poneme malu, porque yo taba mui orgullosu del gaiteru Bras Rodrigo, allalantrones en Nueva York, tocando la nuestra gaita, y yá nun sé si'l chigreru Lastra me va dexar criar esi sentimientu ensin mala conciencia. Habrá que cambiar de chigre.
No hay comentarios:
Publicar un comentario