Acaba l'estíu vacacional, el de les migraciones, fiestes patronales y folixes varies, y nuna selmanina taremos otra vegada metíos en fariña. El veranu ye siempre una prórroga que nos tomamos camentando que los demás nun van tar disponibles pa nada, anque los otros faigan lo mesmo con nosotros. Ello ye, podemos tar toos metíos en materia, pero unos por otros pensamos que los demás tarán de vacaciones o de folganza y que ye meyor dexalos tranquilos hasta qu'aporte setiembre. El veranu, en realidá, acaba n'Asturies con San Matéu, n'Uviéu, y non con Rodiezmu o la fiesta de la Santina, en Cuadonga. Esti añu, hasta que Los Morancos nun nos faigan pasar vergoña al engolase al balcón del Ayuntamientu de la capital pa dar el pregón, nun podremos dicir que acabó'l veranu como estáu d'ánimu, que ye lo importante, non como circunstancia meteorolóxica.
Hai tres coses bones cuando acaba'l veranu: una, que naide tien disculpa p'aplazar les coses pendientes, nin el familiar, nin el políticu, nin el fontaneru; dos, que naide tien la obligación de xustificar un ociu qu'enseñe a los demás la calidá de vida que se-y supón a caún; tres, qu'acaben los incendios forestales, tean o non quemando los montes. Asina que, en pasando San Matéu, y la so vergoña de Los Morancos dando'l pregón, tendrán qu'aprucir les explicaciones aplazaes pol paréntesis vacacional. Ente les más esperaes, los planes de los contendientes pa les elecciones municipales y autonómiques del añu qu'entra: candidatos, estratexes, llistes electorales, aliances.
Pal observador profanu, igual eses poques novedaes pasen desapercibíes, pero nel profesionalizáu y zarráu universu de la política asturiana una pieza namás que se mueva de sitiu puede xiringar tantu la feble estructura de la nuestra autonomía que del últimu domingu de mayu de 2011 surda un cambiu d'importancia pal país. ¿Cómo enfrentará'l PSOE la sucesión de Tini Areces por Javier Fernández, cola riestra de damnificaos y glorificaos que quedarán pel camín o quedrán aupase al carru? ¿Cómo solucionará'l PP la resquiebra que Francisco Álvarez-Cascos-yos ta faciendo cuando acolumbren allalantrones una posible victoria? ¿Cómo pretenderá IU ser una alternativa depués de compartir la xera de gobiernu en tiempu de crisis y con resultaos tan probes? ¿Cómo articulará l'asturianismu la innegable oportunidá de volver a les instituciones sumando fuerces y estremándose de les ofertes de la izquierda y la derecha? Munches entrugues que namás tendrán respuesta viendo a poco y a poco los xestos, les actitúes y hasta los estilos de caún nos meses que queden hasta la cita electoral. ¿Barrerá Javier Fernández los chiringuitos d'Areces? ¿Sacará'l PP un candidatu con puxu? ¿Encuriosará IU una coalición que yá abandonaron la mayor parte de los socios comunistes, asturianistes y verdes? ¿Sumarán les sigles asturianistes alredor de la única opción creyible y con posibilidaes?
Pal observador profanu, igual eses poques novedaes pasen desapercibíes, pero nel profesionalizáu y zarráu universu de la política asturiana una pieza namás que se mueva de sitiu puede xiringar tantu la feble estructura de la nuestra autonomía que del últimu domingu de mayu de 2011 surda un cambiu d'importancia pal país. ¿Cómo enfrentará'l PSOE la sucesión de Tini Areces por Javier Fernández, cola riestra de damnificaos y glorificaos que quedarán pel camín o quedrán aupase al carru? ¿Cómo solucionará'l PP la resquiebra que Francisco Álvarez-Cascos-yos ta faciendo cuando acolumbren allalantrones una posible victoria? ¿Cómo pretenderá IU ser una alternativa depués de compartir la xera de gobiernu en tiempu de crisis y con resultaos tan probes? ¿Cómo articulará l'asturianismu la innegable oportunidá de volver a les instituciones sumando fuerces y estremándose de les ofertes de la izquierda y la derecha? Munches entrugues que namás tendrán respuesta viendo a poco y a poco los xestos, les actitúes y hasta los estilos de caún nos meses que queden hasta la cita electoral. ¿Barrerá Javier Fernández los chiringuitos d'Areces? ¿Sacará'l PP un candidatu con puxu? ¿Encuriosará IU una coalición que yá abandonaron la mayor parte de los socios comunistes, asturianistes y verdes? ¿Sumarán les sigles asturianistes alredor de la única opción creyible y con posibilidaes?
La fin del veranu nun va resolver toles incógnites pendientes, nin lo va facer nunos díes namás, pero San Matéu, y la vergoña de Los Morancos dando'l pregón de les fiestes, va quitar la disculpa de la interinidá vacacional pa que caún pueda resolver tantes duldes como tenemos sobre'l futuru que-y nos preparen a los asturianos. Por cierto, ¿al conceyal José Suárez Arias-Cachero, d'antigua tradición asturianista y llingua afilada, nun-y cai la cara de vergoña trayendo al duu andaluz a dar el pregón?
No hay comentarios:
Publicar un comentario