Tantes veces tenemos dicho yá que don Javier Fernández nun pronuncia palabra ensin sentíu, nin da puntada ensin filu, y tantes otres lo tendremos que dicir. La última, el «modelu cuenques mineres» que quier esparder peles Asturies toes si gana les elecciones de mayu del añu qu'entra. Una parte de la opinión asturiana (la poca qu'hai) escolforóse toa al sentir la propuesta de don Javier: ¿esparder el 'modelu cuenques' pel restu d'Asturies? ¿Exportar la tasa de paru, la mengua demográfica, el descensu de l'actividá, la dependencia minera, la emigración de los mozos, el despilfarru de recursos públicos? ¿Quieren el PSOE y'l so candidatu enterrase vivos enantes tovía de perder les elecciones? Entrugues toes interesantes pero vacíes, porque don Javier Fernández, candidatu a candidatu y candidatu a presidente, sabe bien lo que diz, tien pensao lo que diz, diz lo que quier dicir. Lo que'l proponente, y la FSA, y'l 'sindicatu', y los cargos públicos, y los allegaos quieren esparder ye'l sistema de control social, d'intervención na vida de los ciudadanos, de clientelismu y de discursu únicu de les cuenques pel restu d'Asturies. El paru, la baxa actividá, la emigración, etcétera, nun son más que los «daños collaterales» d'esi modelu que-yos permite sucedese en persones y xeneraciones a lo llargo de los tiempos nel dominiu d'un territoriu y los sos habitantes.
Porque la realidá ye que partes pequeñes pero significatives d'Asturies siguen tovía irredentes al control socialista; grupos de persones, territorios, actividaes hai que sobreviven al marxen del control social y económicu de don Javier y los sos subalternos. El mensaxe subliminal ye mui evidente: si nos dais otra vegada'l poder democráticu, si nos volvéis a votar a pesar del llaceriosu 'modelu cuenques', de la nefasta política de Zapatero, de la insignificancia d'Asturies, de la traición del Estatutu catalán, de les mentires constantes, entós, Asturies entera será como Sama, como Mieres, como Morcín, como Degaña, como Ciañu, como Llaviana. Con que vos arriméis a nosotros, con que nun vos llevantéis en protesta, con que conozcáis a dalguién, con que lo pidáis de bon xeitu, tendréis el presente y'l futuru aseguraos, conservaréis el trabayu, podréis prexubilavos, nun quedaréis albentestate. Eso sí, al vuestru alredor la realidá podrecerá, los fíos emigrarán y seremos menos y más vieyos, pero nun se puede tener too.
Una declaración de principios la de don Javier Fernández, un actu de valentía, una seña de sinceridá que nun sé si sabremos los asturianos apreciar: el socialismu ofreznos protección a cambiu de llealtá y silenciu; tranquilidá, a cambiu d'inmovilismu y conservadurismu; seguridá, a cambiu de la inmigración de los mozos. Nun puede -yo nun lu conozo- haber un programa políticu más claru, más concretu y más fácil de reconocer que'l 'modelu cuenques', col vale de carbón, l'economatu y la Casa'l Pueblu como iconos, col partíu y'l sindicatu como guíes, colos fondos mineros como santos en procesión. Eso sí, el que nun se quiera apuntar, en Lluarca o en Llanera, en Villaviciosa o en Ponga, yá sabe lo que-y espera: nun tendrá subvención, nin trabayu nel Ayuntamientu, nin prexubilación... El 'modelu cuenques' de don Javier, ¡qué poco lu entienden!
PS: El socialismu sucursal asturianu (Masip, Fernández, Villa) anda que lu lleva los degorrios coles empreses eléctriques porque recurrieron el decretu d'ayudes al carbón, porque tienen subvenciones pa les renovables, porque faennos pagar el parón nuclear. Y ún camiénta, ¿quién lleva décades dictando la política enerxética n'España? ¿Nun son ellos, los que se quexen? Vaya cara.
No hay comentarios:
Publicar un comentario