Razones pa defender l’autonomía en desterciu del centralismu
Nos últimos tiempos vieno llevantándose una vagamar creciente contra les autonomíes. Nesa actitú hai bastantes más componentes que les causes oxetives», pues, si ye cierto que puede acusase a les alministraciones perifériques de despilfarru económicu, contrataciones escesives, gastu clientelar y déficit, nun ye menos cierto que l’Alministración central y los conceyos son tan responsables d’eses práctiques como les autonomíes, y, sicasí, nun son oxetu d’una tan feroz campaña d’ataques. El plus», por tanto, d’inquina escontra les autonomíes débese a razones de tipu ideolóxicu (una enraigonada tradición uniformadora y centralista, fundamentalmente) y a componentes de tipu emocional frente a lo que pudiéramos denominar «nuevos señoritos». Sobre ello, ta sofitándose un discursu de vuelta atrás y d’eliminación o amenorgamientu del entramáu autonómicu.
Llama l’atención, nesi planteamientu destaquen Asturies y Madrid, como les autonomíes onde esa posición tien más predicamentu. Yá señalé en La Nueva España, cómo, en gran midida, ello debe a la práctica inesistencia d’una opinión pública asturiana (esto ye, conformada equí, dende la nuesa perspectiva y sobre la nuesa realidá, non puramente vicaria) y a l’ausencia de discursu autonomista de los dos partíos que, nel nuesu país, gocien de les prebendes del sistema descentralizáu. Tien d’apuntase tamién qu’esi sentimientu antiautonomista ye abondo mayor na derecha que na esquierda, en coherencia coles componentes históriques y sociolóxiques de la mesma. Sorrayemos, coles mesmes, les incoherencies del discursu: quexase, por casu, de que’l nuesu Gobiernu prime pocu al central y querer menos autonomía; tar satisfechos cola xestión en sanidá o carreteres propies y ser partidarios del centralismu.
Preguntémonos si-y convendría a Asturies una vuelta al uniformismo centralista. Cualesquiera va recordar, per un sitiu, qué difícil yera n’otres dómines consiguir decisiones alministratives simples (una escuela, un centru de salú) cuando tola xestión del Estáu dependía de la capital del Reinu y equí nun había más que delegáu ensin poder efectivu y cola perspectiva personal de realizar la so carrera a base de «nun dar la lata» en Madrid. Señalémoslo: anque equí los políticos mayoritarios siguen siendo como los de «aquellos tiempos», la xestión de l’Alministración ameyoró en rapidez y eficacia. La vuelta, pos, a un sistema de xestión política centralizáu supondría un claru empeoramientu, y el caciquismu o «los contactos» supondríen la única forma de consiguir coses. Si se piensa, por casu, que, con autonomía, «nun pintamos nada» pal Gobiernu central, ¿qué sedría ensin ella?
Pero supongamos que, efectivamente, llegar a consiguir la devolución competencial y la desapaición de les autonomíes. Como rescampla que l’amenorgamientu nun se produciría en, siquier, Cataluña, Euskadi y Navarra, lo qu’asocedería sería que s’establecería un Estáu de dos niveles, el federal-autonómicu y el centralista-uniformista, reforzando y consolidando, asina, lo que yá güei ta n’acurres. Tala situación, escontra la qu’apunten tantu los recentralizadores como los federalistes, nun nos sedría en nada beneficiosa a los asturianos.
Al mio pensar, el problema a qu’enfrentamos los asturianos ye que nun supimos xestionar bien el sistema autonómicu, que nun-y sacamos toles sos potencialidaes. Ello producióse pente medies de la conxunción de llideralgos sociales y políticos pocu interesaos na autonomía y la realidá asturiana; la implantación na sociedá de discursos que faen confundir los intereses de los asturianos colos de los ciudadanos d’otres partes d’España; el caltenimientu xeneralizáu d’una visión conservadora y falsa del mundu contemporaneu; la entrega, pente medies del votu, de la xestión alministrativa y económica a equipos, polo xeneral, desnortiaos y incapaces; inclusive, una xestión deficiente -en cuanto probe y simplificadora- per parte de los ciudadanos de los equilibrios y contrapesos de la representación y del control políticos .
Agora bien, nun tien de creese qu’un meyor usu de l’autonomía o una mayor capacidá política y competencial tien de sirvir namás pa «pidir o esixir más a Madrid», según tantes vegaes se piensa, sinón, más bien, pa esixinos más a nós mesmos, confianos más capaces y innovadores, premiar l’esfuerzu, buscar que queden equí la mocedá y los meyores (y entá que vengan de fuera), confiar más no nueso y nos nuesos, modernizanos, «querenos más». Nuna palabra, actuar dende la primacía de los intereses de los asturianos y pa ellos, nun considerándolos inesistentes o subordinándolos a otros (lo que, ye obvio, nun implica, pa nada, vocación de conflictu buscáu o de segregación), nin, muncho menos, xulgándonos como infantes incapaces d’actuar ensin tutélala o l’auxiliu de los sos mayores.
Nuna palabra, la nuesa crisis permanente (dende va década -sorrayémoslo- cuando España va bien, Asturies va regular; cuando mal aquélla, nós tamién) nun se debe a un escesu d’autonomismu o asturianismu, sinón al so escandalosu déficit. El nuesu sanamientu nun ha de venir, por tanto, de «más España y menos Asturies», sinón al revés.
No hay comentarios:
Publicar un comentario